பக்கத்து வீட்டு பாத்திமா: என்னா இஷா தொழுதாச்சா?
எதிர் வீட்டு நபீஸா : ம்.... இப்பதான் தொழுவுனேன். அப்புடீயே உம்மாவுக்கு மருந்து கொடுத்துட்டு வாசல்ல வந்து பார்த்தேன். உன்னைய காணோம்!
பக்கத்து வீட்டு பாத்திமா: இஷா தொழுதுட்டு என் மகன் தஃலீம் படிச்சாங்க. அதான் லேட்டு, இரி அடுப்புல பால் வச்சேன். பார்த்துட்டு வந்துற்றேன்.
எதிர்வீட்டு நபீஸா: வந்தாச்சா, சமையல் கேஸ் ஒரு சிலிண்டருக்கு நேத்து நள்ளிரவு 12 மணிலேந்து 50 ரூபாய் உயர்த்திட்டாங்களாம்!
பக்கத்து வீட்டு பாத்திமா: எல்லா கட்சிகாரணுவலும் போராட்டம் பண்ணதுல தமிழ் நாட்டுல சமையல் கேஸ் மீதான வரியை 4% சதவிதம் குறைத்து விட்டார்களாம்.
எதிர்வீட்டு நபீஸா: இது கண்துடைப்பு தான், விலையை 50 ரூபாய் ஏத்துவாஹலாம். 15 ருபாய் குறைப்பஹலாம். என்னங்க ஞாயம்?
பக்கத்து வீட்டு பாத்திமா: ஒன் மொவன் பட்டுக்கோட்டை அரசு மேல்நிலைப் பள்ளில படிக்கிறானே! அரசாங்கம் இலவசமாக பஸ் பாஸ் கொடுக்ராங்கலாம் வாங்கியாச்சா?
எதிர்வீட்டு நபீஸா: வாங்கிட்டான்டு நினைக்கிறேன்.
பக்கத்து வீட்டு பாத்திமா: வற்ற வருஷத்துலேந்து கல்வி ஆண்டில் 1 முதல் 10ஆவது வகுப்பு வரை எல்லாருக்கும் மெட்ரிகுலேசன், மாநிலக் கல்வி வாரிய முறை, ஓ,எஸ்,எல்,சி., ஆங்லோ இந்தியன் ஆகிய 4 முறையான கல்வியை ஒழிச்சிட்டு எல்லாருக்கும் ஒரே கல்வி முறை/சமச்சீர் கல்விமுறை வரும் கல்வி ஆண்டுல அமல்படுத்துவாகலாம்.
எதிர்வீட்டு நபீஸா:எனக்கு ஒன்னும் புரியல நம்ம பிள்ளைகளுக்குத்தான் ரொம்ப கஷ்டமா போச்சு (பாவம்)!!
பக்கத்து வீட்டு பாத்திமா: வா குப்பைய போட்டுட்டு வருவோம்.
எதிர்வீட்டு நபீஸா: நில்லு. நானும் குப்பை எடுத்துட்டு வர்றேன்.
பக்கத்து வீட்டு பாத்திமா : என்னா இவ்ளோ குப்பே! குப்பைத் தொட்டி நெறஞ்சு ரோட்டுலயும் கெடக்குது பாரேன்.
எதிர்வீட்டு நபீஸா: எல்லா பெண்களும் சேர்ந்து பஞ்சயாத்து போர்டு வாசல்ல குப்பையக் கொட்டி ஆர்ப்பாட்டம் செய்யனும்! அப்பத்தான் புத்திவரும்.
பக்கத்து வீட்டு பாத்திமா : சரியா சொன்னே,...... அப்படியாயிருந்தா நானும் வர்றேன். கடைசி வீட்டுல புள்ள பொறந்துரிச்சாம்ல!
எதிர்வீட்டு நபீஸா:ஆமாம் பெண் குழந்தையாம். வா போய் பாப்போம்.
பக்கத்து வீட்டு பாத்திமா: எந்த ஆஸ்பத்திரி?
எதிர்வீட்டு நபீஸா: நம்ம ஷிஃபா ஆஸ்பத்திரிலதான்.
பக்கத்து வீட்டு பாத்திமா: பட்டுக்கோட்டை, தஞ்சாவூருண்டு போறத்துக்கு இங்கேயே பார்த்திடலாம். இப்போ எல்லா வசதியும் வருதுல!
எதிர்வீட்டு நபீஸா: கடைசி வீட்டு ஜொகராமாக்கு பட்டுக்கோட்டையில ஆபரேசன் பண்ணுனுனாத்தான் பிள்ளை பிறக்கும்னு சொன்னாங்க ஆனா, இங்கே சுகப்பிரசவம் ஆயிருச்சு. அல்ஹம்து லில்லாஹ்.
பக்கத்து வீட்டு பாத்திமா: சரி அவ்வோ வந்தாச்சுண்டு நினைக்கிறேன். நான் போயிட்டு வர்றேன். நாளைக்கு வா ரெண்டு ஊட்டுக்கும் சீனி குடுத்துட்டு வருவோம்.
எதிர்வீட்டு நபீஸா: இன்ஷா அல்லாஹ் போகலாம். நாளைக்குப் பார்க்கலாம்.
ஆக்கம் : அதிரை எக்ஸ்பிரஸ்
பதிப்பு :சகோதரி மசூதா
