ஆனா : அஸ்ஸலாமு அலைக்கும் என்னா சேனா பாத்து ரொம்ப நாளாச்சே இவ்ளோ நாளா எங்கே போயிருந்தா?
ஆனா : ஒரு வழியா சமச்சீரு கல்வி பெரச்சினை சூப்ரீம் கோர்ட் மூலமா முடிஞ்சி இப்பொ தான் புள்ளையெலுவொலுக்கு புக் கொடுக்க ஆரம்பிச்சி இருக்காங்க. அப்பொ இவ்ளோ நாளு சும்மா பிள்ளைகளின் பள்ளிப்படிப்பை வேஸ்ட் பண்ணுணதுக்கு யாரு பொறுப்பு ஏக்குறது? தண்டணை கொடுக்குறது? சொல்லு...
சேனா : இப்புடித்தானே நம் நாட்டில் பல இடங்களில் தீவிரவாதிகளுடன் தொடர்பு, குண்டு வெடிப்பில் தொடர்புண்டு நம் சமுதாய அப்பாவி இளைஞர்களை சந்தேகத்தின் பேரில் கைது செய்து சிறையில் அடைத்து சித்ரவதை செய்து பிறகு பல வருடங்கள் கழிந்து கோர்ட் மூலம் இவர்கள் நிரபராதி, நடந்த சம்பவத்திற்கும் இவர்களுக்கும் தொடர்பில்லை என்று அறிவித்து வெளியிட்ட சம்பவங்களை நாம் பார்த்திருக்கிறோமே.. அப்பொ இவ்ளோ நாளு சிறையில் இருந்து காலத்தை வீணடித்து சித்ரவதைக்குள்ளாகி அவர்களின் வாழ்வாதாரம் பாதிக்கப்பட்டு போனதற்கு யார் பொறுப்பு ஏற்பது? தவறான அவர்களின் நடவடிக்கைக்கு யார் தண்டணை வாங்கி கொடுப்பது? சொல்லு...
ஆனா : சரியான கேள்வி இப்புடி கேட்டு வாயடைக்க வச்சுட்டியே? சம்மந்தப்பட்டவங்க தான் இதுக்கு பதில் சொல்லனும்.
சேனா : அது சரி மூனு வருசமா எந்த தடையுமின்றி நடத்தப்பட்ட பாப்புலர் ஃப்ரண்ட் ஆ ஃ ப் இந்தியாவின் சுதந்திர தின அணிவகுப்பு நெல்லை மேலப்பாளையத்தில் இந்த மாதம் 15ம் தேதி நடக்க இருந்ததே? அதற்கு திடீரென காவல்துறை அனுமதி மறுத்திருக்கிறதே? என்ன காரணம்? சட்டம் ஒழுங்கு சீர்கெடும் அளவுக்கு அவர்களின் கடந்த கால நிகழ்வுகள் எதுவும் நடைபெறவில்லையே? பிறகு ஏன் தடை செய்தது அரசு? உனக்கு ஏதேனும் காரணம் தெரியுமா?
ஆனா : எனக்கு தெரிந்த வரை காவி (பாஸிச) சிந்தனை உள்ள எவரேனும் இந்த அணிவகுப்பு பற்றி தவறான ஒரு கருத்தைச்சொல்லி நீதி மன்றத்தில் வழக்கு தொடர்ந்து தடை உத்தரவு எதுவும் வாங்கி இருக்கலாம். இவ்வளவு தூரம் நாட்டின் தேசப்பற்றுள்ள இளைஞர்களை தேர்ந்தெடுத்து அவர்களுக்கு பயிற்சி கொடுத்து சீருடைகளெல்லாம் சிறப்பாக சொந்த செலவில் தைத்து கொடுத்து நாட்டின் உண்மையான தேச பற்றை பறைசாற்ற அவர்கள் இந்த புனித ரமளானில் எடுத்துக்கொண்ட முயற்சிகள் காவல்துறையால் நிறுத்தப்பட்டு வீணடிக்கப்பட்டதை நினைத்தால் மனதுக்கு வேதனையாக இருக்குது சேனா...
சேனா : என்ன செய்யிறது? நம்ம உண்மையான தேசப்பற்றையும் நம் முன்னோர்களின் உண்மையான தியாகத்தையும் இப்பொழுதுள்ள அரசும், அதன் அதிகாரிகளும் புரிந்து கொள்ள மாட்டிக்கிறாங்கெ...நம்மை ஒரு வேண்டா வெறுப்பாக என்றும் மூன்றாம் தரக்குடிமகனாகவே அவர்கள் பார்க்க விரும்புகிறார்களோ? என்னவோ தெரியவில்லை?
ஆனா : நாமெ எப்பொழுதும் இறைவனிடம் கையேந்தி நம் குறைகளை சொல்லி பொறுமையாக இருப்போம். இந்த உலக வாழ்க்கை என்னா நிரந்தரமா? சும்மா போலி வாழ்க்கை. ஒரு நீண்ட பயணத்தில் வழியில் களைப்பாற சிறிது நேரம் ஓய்வெடுக்க தங்கும் ஒரு மரத்தின் நிழல் போல் தான் இந்த வாழ்க்கையை நெனச்சிக்கிடனும். நாம் இங்கு நிரந்தரமாக தங்கப்போவதில்லை என்று நினைத்து மீதி உள்ள காலத்தை அமைதியாக ஓட்டி விட்டு போய்ச்சேர வேண்டியது தான் சேனா...
சேனா : இந்தியாவில் ஹரியானா மாநிலத்தில் கர்னல் என்ற இடத்தில் 1961ல் பிறந்து ஆரம்பக்கல்வி அங்கேயே படித்து பிறகு மேல் படிப்பிற்காக (எம்.எஸ்) 1982ல் அமெரிக்கா சென்று அங்கேயே படித்து பிறகு ஆராய்ச்சி பட்டமும் பெற்று அதன் பின் அந்த நாட்டு பிரஜையாகி ஒரு அமெரிக்கரை மணந்து நாசாவில் சேர்ந்து அந்த நாட்டு பிரஜையாக அந்த நாட்டு கொடியை ஏந்தி மற்றும் அதை தன் உடையில் அணிந்து 2003 பிப்ரவரி 1ம்தேதி நாசாவிலிருந்து கொலம்பியா ஓடத்தில் விண்ணில் பறந்த சில நிமிடங்களில் அது விண்ணில் வெடித்துச்சிதறி பலியான கல்பனா சாவ்லாவுடன் அவருடன் பயணித்த மொத்தம் ஏழு விஞ்ஞானிகளும் பலியான விசயம் உலகறியும். அப்படி இந்தியாவில் பிறந்து இறுதியில் அமெரிக்காவில் செட்டிலாகி அந்த நாட்டுக்காரரை மணந்து அந்நாட்டின் பிரஜையாகி இறுதியில் விண்வெளி விபத்தில் பலியான கல்பனா சாவ்லாவை நம் நாடு இன்றும் நம் நாட்டு பிரஜையாக எண்ணி உள்ளம் உருகி அவர் மறைந்து பின்னரும் போற்றிப்புகழ்கின்றது.
அவர் பெயரில் பல அறக்கட்டளைகளும், கல்லூரி, நிறுவனங்களும் நம் நாட்டில் உருவாகி அதையும் தாண்டி 'கல்பனா சாவ்லா விருது' என்று உருவாக்கி நாட்டில் வீர,தீர செயலில் துணிச்சலுடன் ஈடுபட்டவர்களுக்கு சுதந்திர மற்றும் குடியரசு தினங்களில் மத்திய, மாநில அரசுகள் வழங்கி அவர்களுடன் கல்பனா சாவ்லாவையும் மறக்காமல் கவுரவித்து மகிழ்கிறது. இதை நாம் குறை சொல்ல வில்லை.
ஆனால் நம் நாட்டில் பிறந்து, வளர்ந்து, அதனுடன் பின்னிப்பிணைந்து வாழ்ந்து வரும் நம் சமுதாய துடிப்புள்ள இளைஞர்கள் பலரின் கூட்டு முயற்சியில் நம் நாட்டுப்பற்றை பறைச்சாட்டும் வகையிலும் நம் முன்னோர்களின் தியாகங்களை நினைவுகூறும் வகையில் அவர்கள் நடத்த இருந்த இந்த சுதந்திரதின அணிவகுப்புக்கு தடை விதித்திருப்பது நம் தேசப்பற்றை கொச்சைப்படுத்துவதாகவே கருதுகிறேன். அவர்களுக்கு சுதந்திர தின கொடியேற்றத்தில் விருதுகள் கொடுத்து கவரவிக்க வேண்டியதில்லை அதை அவர்கள் எதிர்பார்க்கவும் இல்லை. குறைந்தது அவர்களின் அணிவகுப்பிற்கு அனுமதி அளித்திருக்கலாம் அல்லவா?
ஆனா : என்னப்பா இப்படி உன்னுடைய ஆதங்கத்தை கொட்டி தீர்த்திட்டியெ? நீ சொல்றது ஞாயம் தான்.. நாமெ சும்மா இருந்தால் இவர்களுக்கு இந்த நாட்டின் மேல் பற்றில்லை, நம்பிக்கை இல்லை தும்பிக்கை இல்லை என்று எதேதோ வாய்க்கு வந்தபடி குற்றம் குறைகள் பல சொல்லி நம் உண்மை வரலாறு அறியாமல் இவர்கள் இந்தியாவிற்கு குடிபெயர்ந்த வந்தேறிகள் என்று சொல்லி இவர்கள் நாட்டை விட்டு வெளியேறி பாக்கிஸ்தானில் குடியேற வேண்டும் என்று சொல்வதை அரசும் நாமும் பல இடங்களில் பல முறை கனத்த இதயங்களுடன் கேட்டும், பார்த்தும் வருகிறோம். எல்லாவற்றிற்கும் படைத்த இறைவன் போதுமானவன். அவனிடமே முறையிட்டு நிராயுதபாணியாய் இன்று நின்று கொண்டிருக்கிறோம்.
சேனா : ஆனா, நோன்புக்கு பள்ளிகளுக்கு அரிசி தருவதில் கூட எத்தனை அரசியலும், அலட்சியமும் காட்டுகிறார்கள் பாத்தியா?
ஆனா : ஆமா சேனா, அரசவையில் அலங்கரிக்க வேண்டிய நாம் இன்று அரிசிக்கு அல்லல்பட வைத்து விட்டார்கள் இல்லையா?
சேனா : இவர்கள் வரும் காலத்திற்கு பதில் சொல்கிறார்களோ இல்லையோ? இறைவனுக்கு பதில் சொல்லியே தீர வேண்டும்.
ஆனா : நாம் இந்த புனித ரமளானில் எதற்கும் சபுர் செய்து பொறுமையுடன் இருப்போம். எதற்கும் பொறுமை இழக்கக்கூடாது. நமக்கு அல்லாஹ் துணை நிற்பான். சரி வரட்டா நோன்பு தொறக்க நேரமாஹிகிட்டு இருக்குது அப்புறம் வாடா வித்து போயிடும் வாட் சம்சாவும் கெடெக்காது...
இன்ஷா அல்லாஹ் அப்புறம் பாப்போம்....
இன்ஷா அல்லாஹ் அப்புறம் பாப்போம்....
- மு.செ.மு. நெய்னா முஹம்மது.
நன்றி :அதிரை-நிருபர்
