* பாடப் புத்தகங்களிலிருந்துதான் வினாக்கள் கேட்கப்படும். எனவே, வழிகாட்டி நூல்களை (guide) மட்டுமே முழுமையாக நம்பி இருக்க வேண்டாம். பாட நூல்களை முழுமையாகப் படிக்க வேண்டும்.
* டியூசன் படித்தாலும்கூட, வீட்டுக்கு வந்து பாடங்களைப் படிக்க குறிப்பிட்ட அளவு நேரத்தை ஒதுக்க வேண்டும்.
* எந்தப் பாடங்களை எப்போது படிப்பது என்பது குறித்து கால அட்டவணை தயார் செய்து கொண்டு படிக்க வேண்டும். அப்போதுதான் பாடங்கள் மனதில் நிற்கும்.
* படித்த விஷயங்களைத் திரும்பத் திரும்ப மனதில் கொண்டு வந்து பழக வேண்டும்.
* சூத்திரங்கள், சமன்பாடுகள், கோட்பாடுகள் போன்றவற்றைக் குறிப்புகளாக எடுத்து வைத்துக் கொண்டால் அவற்றைத் திரும்பப் பார்க்கும் போது படித்தது நினைவுக்கு வரும்.
* பாடங்களைச் சிலர் மனப்பாடமாகச் சொல்லிவிடுவார்கள். ஆனால், எழுதும் போது தடுமாற்றம் ஏற்படலாம். எனவே, படித்த வினாக்களுக்கான விடைகளை எழுதிப் பார்ப்பது நல்லது.
* மனப்பாடப் பகுதிகளை வீட்டிலேயே ஒன்றுக்குப் பலமுறை எழுதிப் பார்த்து பிழையின்றி எழுத முடிகிறதா என்று பார்க்க வேண்டும்.
* தொடர்ந்து படித்துக் கொண்டிருப்பதைவிட, இடைவெளி விட்டுப் படிக்கும்போது, படிக்கின்ற பாடங்கள் மனதில் நன்கு பதியும்.
* தேர்வுக்கு முன்தினம் நீண்ட நேரம் கண்விழித்துப் படிக்காதீர்கள். மறுநாள் தேர்வு எழுதும்போது சோர்வு ஏற்படலாம்.
* அடுத்த நாள் தேர்வுக்கு வேண்டிய பேனா, பென்சில், ரப்பர், ஜியோமிதி பெட்டி, ஸ்கேல் போன்ற அனைத்தையும் எடுத்து வைத்துக் கொள்ளவும். கூடுதலாக ஒரு பேனா வைத்திருப்பது நல்லது.
* தேர்வு நடைபெறும் நாளில் தேர்வு நடைபெறும் இடத்துக்கு, உரிய நேரத்துக்கு முன்னதாகவே சென்றுவிட வேண்டும். வீண் காலதாமதம் தேவையற்ற பதற்றத்தை ஏற்படுத்தும்.
* தேர்வு அறையில் நுழைந்தவுடன் உங்கள் எண்களைக் கண்டுபிடித்து உங்கள் இருக்கையில் அமரவும்.
* மூச்சுப் பயிற்சியைச் சிறிது நேரம் செய்வதன் மூலம், உடலும் மனமும் அமைதி பெறும்.
* பரபரப்படையாமல் முதலில் வினாத்தாளை முழுவதுமாகப் படிக்க வேண்டும்.
* விடைத்தாளில் வினா எண்ணைத் தெளிவாகக் குறிப்பிடவும்.
* வினாத்தாளைப் பார்த்ததும் தெரியாத வினாக்கள் இருந்தால் திகைத்து விட வேண்டாம்.
* உங்களுக்குத் தெரிந்த வினாக்களுக்கு முதலில் அடித்தல் திருத்தல் இல்லாமல் எழுதத் தொடங்குங்கள்.
* ஒவ்வொரு வினாவையும் படித்து, என்ன கேட்கப்பட்டிருக்கிறதோ அதற்கு மட்டும் முழுமையாக விடையளிக்க வேண்டும்.
* எளிய வார்த்தைகளைக் கொண்டு சிறிய வாக்கியங்களில் உங்கள் பதில்களை எழுத வேண்டும்.
* உங்கள் கையெழுத்து தெளிவாக இருக்க வேண்டும்.
* முக்கியத் தலைப்புகளையும் துணைத் தலைப்புகளையும் தெளிவாக எழுதி கோடிட்டு வேறுபடுத்திக் காட்ட வேண்டும்.
* ஒவ்வொரு வினாவையும் எவ்வளவு நேரத்தில் எழுதி முடிக்க வேண்டும் என்பதை உணர்ந்து அதற்கேற்ப விரைவாகப் பதில்களை எழுத வேண்டும்.
* ஒரு சில வினாக்களுக்கு விடை எழுத அதிக நேரம் எடுத்துக் கொண்டால் அதற்கு அடுத்து எழுதும் விடைகளில் அந்த நேரத்தைச் சரிசெய்து கொள்ள வேண்டும்.
* ஒரு வினாவுக்கான விடை நினைவுக்கு வராமல் போனால் அதையே நினைத்துக் கொண்டு அதனுடனே போராடிக் கொண்டு இருக்கக் கூடாது.
* அந்த நேரத்தில் அதை விட்டு விட்டு மற்ற விடைகளை எழுத வேண்டும். இவை பின்பு தானாக நினைவுக்கு வரும். அப்பொழுது எழுதிக் கொள்ளலாம்.
* தேர்வு முடிவதற்கு 15 நிமிடங்களுக்கு முன் நீங்கள் அனைத்தையும் எழுதி முடித்திருக்க வேண்டும்.
* ஒவ்வொரு விடையையும் விரைவாகப் படித்து அதில் தவறு இருந்தால் சரிசெய்ய வேண்டும்.
* தேர்வின் இறுதி நிமிடங்களில் அதிகமாக எழுத வேண்டியிருந்தால் சுருக்கமாக தேவையானவற்றை மட்டும் ஒருசில வரிகளில் எழுதி முடித்து விட வேண்டும்.
* கடும் உழைப்பும் தன்னம்பிக்கையும் விடாமுயற்சியுமே வெற்றிப் பாதைக்கு வழிகாட்டி.
