மருத்துவமனையில் நான் . . !!!

அஸ்ஸலாமு அலைக்கும்...

துவண்டுப்போனச்

செல்களும்

சிலிர்த்து நிற்கும்;

என்னை நீ வயிற்றில்

உதைத்தத் தருணம்;

கலங்கியக் கண்ணீர்

காதை நிரப்ப;

உறவுகள் ஆறுதல்

உரைக்க;

மருத்துவமனையில் நான்!

மரணமோ என்னை;

வலியால் மிரட்ட;

யார் என அறியாத

மகப்பேறு மருத்துவர்கள்;

உன் வரவுக்காக

என் வழித்தடத்தை நோக்க;

வெட்கம் எனைக் கொல்ல;

உனக்காகதான் என

அழுகையால் எனக்கே

ஆறுதல் தழுவ;

அழகாய் நீ என் பக்கத்தில்

நான் மயக்கத்தில்!

கணக்கில்லா

முத்தத்தோடு வளர்ந்த நீ;

கணக்குப்பார்த்து எங்கள்

கணக்கை முடிக்க;

இன்று முதியோர் இல்லத்தில்

நானும் உன் தகப்பனும்!

அழுகை நேரம் போக;

உள்ளம் உன்னைதான் தேடும்;

உண்டாயா உறங்கினாயா என்று!

ஆக்கம் : - யாசர் அரஃபாத்