சென்னை மெட்ரோ ரயில் நிறுவனத்தில் பணியாற்றுவதற்கான தகுதிகளை அளிக்கும் வகையில் மெட்ரோ ரயில் பொறியியல் மற்றும் மேலாண்மை முதுகலை டிப்ளமோ என்ற ஓராண்டு படிப்பை ஐஐடி மெட்ராஸ் வழங்குகிறது.
கடந்த ஜுன் மாதம் துவங்கிய இந்த புதிய படிப்பு, சென்னையில் மெட்ரோ ரயில் திட்டத்தில் பணியாற்றும் தகுதி வாய்ந்த பொறியாளர்களை உருவாக்கும் வகையில் அமைக்கப்பட்டுள்ளது. இதில் தற்போது படித்து வரும் மாணவர்கள், வரும் ஜூலை மாதம் இறுதித் தேர்வு முடிந்து மெட்ரோ ரயில் திட்டப் பணிகளில் பணியாற்ற உள்ளனர்.
மெட்ரோ ரயில் திட்டப் பணிகளுக்காக டெண்டர் விடுவது முதல், ரயில் பாதைகளை அமைப்பது, சிக்னல்களை இயக்குவது வரை அனைத்தும் மாணவர்களுக்கு பயிற்சி அளிக்கப்படுகிறது. படிக்கும் காலத்தில் மாதம் ரூ.20,000 உதவித் தொகையாகவும் சென்னை மெட்ரோ ரயில் நிறுவனத்தால் வழங்கப்படுகிறது.
இவர்கள் படித்து முடித்து 5 ஆண்டுகள் மெட்ரோ ரயில் திட்டத்தில் பணியாற்ற வேண்டும். இந்தியாவில் தற்போது மெட்ரோ ரயில் திட்டங்கள் வந்து கொண்டே இருப்பதால் இப்படிப்பை முடிக்கும் மாணவர்களுக்கு ஏராளமான பணி வாய்ப்புகள் உள்ளன.
பி.டெக். படிப்பில், சிவில், மெக்கானிக்கல், எலக்ட்ரிகல், எலக்ட்ரானிக்ஸ் அன்ட் கம்யூனிகேஷன் ஆகிய பிரிவுகளை எடுத்து படித்தவர்கள் இந்த படிப்பில் சேரலாம். இதற்காக நடத்தப்படும் நுழைவுத் தேர்வின் அடிப்படையில் மாணவர்கள் சேர்க்கப்படுகிறார்கள்.
